Mikabat na matud pa sa kapin P7.47 milyon ang nagasto ni Vice President Sara Duterte alang sa iyang mga biyahe sa gawas sa nasud.
Sumala ni Kelvin Gerome Tenido, hepe sa Budget Division sa Office of the Vice President (OVP), sukad pa niadtong Hulyo 31, ang kinatibuk-ang nagasto sa tanang biyahe ni Duterte misaka na sa P20.68 milyon.
Sa maong kantidad, P13.21 milyon ang gigahin alang sa lokal nga biyahe, samtang P7.47 milyon ang para sa international travel.
Gipanghimakak ni Lemuel Ortonio, assistant chief of staff sa OVP, nga walay giabusong pondo sa maong mga biyahe.
Gipasabot niini nga adunay husto ug legal nga mga dokumento ug travel authority ang matag lakaw sa Bise Presidente.
Gikatakdang mubiyahe pag-usab kini paingon sa Tokyo ug Nagoya, Japan karong umaabot nga Setyembre 20 ug 21. Gikaingong kini ang ika-13 nga biyahe ni VP Duterte sa gawas sa nasud karong tuiga.