Padayon nga nagpabilin sa evacuation centers ang pipila ka mga pamilyang apektado sa pagbaha miaging adlaw.
Matud ni Arian Johnson Caga-anan, Operations and Warning Division Head sa City Disaster Risk Reduction and Management Office (CDRRMO) sa dakbayan sa Malaybalay, nga nakasinati og pagbaha ang pipila ka mga lugar tungod sa pag-overflow sa mga kanal.
Daling girespondehan sa rescue team ang mga apektado sa baha, diin ning kasamtangan nga miubos na ang lebel sa tubig,apan nagpabilin pa ang mga pipila ka residenteng apektado sa evacuation center.
Dul-an 500 ka mga indibidwal ang apektado sa maong pagbaha sa mga barangay sama sa Barangay Managok, Violeta, Simaya, Apo Macote, Sinanglanan, Sto Niño ug San Martin.
Hinoon, walay naitalang nakabsan og kinabuhi, ingon man nadaot nga kabtangan.
Ang lokal nga panggamhanan sa Malaybalay, mipahigayon usab og Rapid Damage Assessment and Needs Analysis (RDANA) aron masuta ang aktwal nga kahimtang ug ang mga panginahanglanon sa mga barangay nga naapektuhan sa maong pagbaha.
Sumala sa inisyal nga datos, kapin sa 100 ka mga panimalay ang nabahaan.
Padayon ang paningkamot sa lokal nga panggamhanan sa pagkumpleto sa RDANA aron masiguro ang tukmang aksyon ug tabang sa mga apektadong residente, pinaagi sa koordinasyon sa nagkadaiyang ahensya sa gobyerno ug mga residenteng apektado sa pagbaha.