Gikumpirma sa Philippine Drug Enforcement Agency kon PDEA Provincial Office Bukidnon nga usa ka permanente nga empleyado sa Gobyerno ang ilang naaresto atol sa gipahigayon nga drug operation ning syudad.
Sumala ni Intelligence Office 5 Laila Abad nga dugay na nilang gimonitor ang suspek nga si Alyas Jerome, 47-anyos , permanenteng empleyado sa City Government sa Malaybalay. Tungod sa wala pag-undang sa suspek sa iyang iligal nga binuhatan gilusad ang buy-bust operation pinaage sa personahe sa Philippine Drug Enforcement Agency (PDEA) Bukidnon Provincial Office kauban ang Malaybalay City Police Drug Enforcement Unit sa Purok 4, Barangay 1, Malaybalay City.
Nasayran usab nga ang maong suspetsado nahimong source sa droga sa uban pang mga empleyado sa City Hall sa Malaybalay.Dugang pa niini napalitan ang suspek og kompermadong shabu ug nakuhaan pa kini og pito ka sachet nga dunay sulod nga shabu. Lakip sa ebidensya ang marked money nga P1,000 nga gigamit sa operasyon.
Ang suspek karon atubang sa kasong paglapas sa RA 9165 o Comprehensive Dangerous Drugs Act of 2002. Padayon ang imbestigasyon aron masuta kung aduna ba siyay koneksyon sa mas halapad nga drug network samtang gipadayon sa mga otoridad ang kampanya batok sa ilegal nga droga. Ang pamahayag ni Intelligence Office 5 Laila Abad PDEA Provincial Office Bukidnon.