Gipasalig sa Department of Health (DOH) nga wala pay aktibong kaso sa Nipah Virus sa nasod ug gipanghimatuud nga padayon ang ilang pagpangandam aron mapugngan ang pagsulod sa virus sa mga border sa Pilipinas.
Sumala kang DOH Assistant Secretary Albert Domingo, apil ang Pilipinas sa mga nasod nga nagpahugot sa pagsulod ug paggawas sa mga biyahero, lakip na gikan sa Taiwan ug Thailand, tungod sa hulga sa maong sakit.
Matud pa ni Domingo, base sa ilang padayon nga monitoring, wala pay natala nga mga Pilipino nga adunay sintomas o kasaysayan sa exposure sa Nipah Virus.
Gipasabot usab niini nga base sa datos gikan sa India, duha ra ka kumpirmadong kaso sa Nipah Virus ang natala sa maong lugar.
Mikabat sa 200 ka mga tawo ang na-trace ug na-isolate, apan tanan nag-negatibo sa virus ug gituohan nga kontrolado (contained) na ang sitwasyon karon.
Tungod niini, mas gipahugot pa sa DOH ang mga gilatid nga patakaran sa mga tugpahanan, ilabi na sa Ninoy Aquino International Airport (NAIA), diin nagbutang na og mga dedicated spotter nurses aron magbantay sa mga senyales ug sintomas sa mga muabot nga pasahero.
Dugang pa, gigamit na ang mga terminal cameras nga awtomatikong mobasa sa body temperature sa mga pasahero.
Girequire usab ang pag-fill up sa e-travel documents sulod sa 72 oras aron matino ang mga nasod nga una nilang gibisitahan.
Ang kasagarang sintomas sa Nipah Virus mao ang hilanat, sakit sa lawas, sip-on, ug ubo, samtang ang grabe nga sintomas niini mao ang paghubag sa utok.
Pahimangno sa DOH sa publiko, nga dili mag-panic kung makasinati og maong mga sintomas, kay dili kini pasabot nga Nipah Virus na dayon.
Samtang wala pay bakuna batok sa maong virus, andam na ang DOH sa ilang mga isolation rooms sa mga DOH Hospitals ug sa Research Institute for Tropical Medicine (RITM) sa Muntinlupa isip mga isolation areas kung kinahanglanon.