Droga, motibo sa pagpangdunggab patay sa usa ka lalaki sa Kitaotao Bukidnon

Posibleng droga ang giingong motibo sa brutal nga pagpatay sa usa ka 50-anyos nga lalaki nga nailang si alyas Fonso didto sa Sitio Lawis, Brgy. Bershiba, Kitaotao, Bukidnon.

Kini human narekober sa mga otoridad gikan sa dapit sa krimen ang pito ka pakete sa gituohang shabu nga nagkantidad sa kapin  ₱4,760, ug kwarta nga mobalor sa ₱7,425. Napalgan ang biktima pasado alas 3:00 sa hapon nga nagbuy-od na ug naligo sa kaugalingong dugo human makaangkon og daghang samad dinunggaban.

Gidala pa ang biktima sa balay tambalanan s apan gideklara kining dead on arrival. Sa pagkakaron, padayon pa ang imbestigasyon sa kapulisan aron mailhan ang suspek nga daling miikyas human sa insidente.