Masaligon si Energy Secretary Sharon Garin nga aduna’y kakuhaan ang kagamhanan og suplay sa lana aron mapalig-on ang reserba sa nasud.
Atol sa usa ka hearing sa Senado, gibutyag ni Garin nga nakig-pulong na kini sa nagkadaiyang mga opisyal sa ubang nasud, lakip na ang Minister of Energy sa South Korea, aron maseguro nga matuman ang mga long-term contracts sa Pilipinas.
Gawas sa South Korea, gipasaligan usab ang DOE sa uban pang mga nasud sama sa China ug Japan.
Aron dili lang magsalig sa pipila ka tinubdan, gipahibalo sa gobyerno nga naningkamot ang Philippine National Oil Company (PNOC) nga i-diversify o palapdan ang kakuhaan og lana gikan sa Estados Unidos, Canada, ug South America.
Kini nga lakang gihimo aron maseguro ang suplay kon mosamot ang krisis sa Strait of Hormuz ug uban pang mga dapit sa Middle East.
Sa pagkakaron, aduna na’y ginalihok nga order ang gobyerno alang sa usa ka milyon ka bariles sa krudo (diesel) nga nagkantidad og P10 bilyones.
Gipahimug-atan ni Garin nga bisan duna’y kasegurohan karon, magpabilin gihapon ang kabalaka sa matag suplay tungod sa dili matagna nga dagan sa politika ug krisis sa tibuok kalibutan.