Gibatikos sa usa ka economic advocate ang kakulang sa aksyon sa gobyerno ug Department of Agriculture (DA) batok sa nagpadayong smuggling sa mga produktong agrikultural sama sa karne ug bugas sa nasud.
Sumala ni Ray Talimio Jr., kanhi opisyal sa Oro Chamber, dako kini nga kakulang gumikan inay nga palig-onon ang suporta sa mga lokal nga mag-uuma pinaagi sa National Food Authority (NFA), mas gihatagan og prayoridad ang importasyon.
Gipasabot ni Talimio nga tungod sa mas dakong margin o ganansya sa mga traders gikan sa imported nga mga produkto, napasagdan na ang lokal nga industriya bisan pa man kon adunay igong suplay ang nasud.
Dugang pa, gikadismaya niini ang lakang sa kagamhanan human gitugutan ang mga negosyante sa pag-import og bugas ug mga produktong karne base sa mga permits gikan sa Department of Agriculture.
Matud ni Talimio, mas dako ang margin o ginansya kon mag-import kaysa suportahan ang lokal nga mga mag-uuma pinaagi sa pagpalit sa ilang mga produkto sa resonableng kantidad.
Gipasiugda usab niini ang kamahinungdanon sa food security pinaagi sa pagpanalipod ug pagtabang sa mga lokal nga mag-uuma aron masustiner ang ilang panginabuhian, imbes nga mosalig sa importasyon nga usahay malakipan pa og smuggling.