Nangandam na ang mga awtoridad sa Canary Islands, Spain alang sa pag-abot sa cruise ship nga MV Hondius nga gihapak sa outbreak sa makamatay nga hantavirus. Moabot sa 150 ka mga pasahero ang gikatakdang ipaubos sa screening ug i-evacuate aron mapabalik sa ilang tagsa-tagsa ka mga nasod human sa pipila ka semana nga paglawig sa dagat.
Tulo na ka mga pasahero—usa ka magtiayong Dutch ug usa ka babayeng German—ang nakalas tungod sa maong balatian, samtang duna pay uban nga nagmasakiton. Bisan pa man sa kabalaka sa publiko, gipasalig ni WHO chief Tedros Adhanom Ghebreyesus nga ubos ra ang risgo sa maong virus ngadto sa komunidad ug gipasabot nga ang hantavirus dili sama sa Covid-19.
Dili itugot nga modunggo ang barko sa dungguanan; magpabilin kini sa lawod samtang hinay-hinay nga kuhaon ang mga pasahero pinaagi sa gagmay nga mga sakayan ug idiretso sa airport gamit ang mga bus. Gipaniguro sa kagamhanan sa Spain nga walay mahitabong kontak tali sa mga pasahero ug sa lokal nga molupyo sa isla.