Andam na ang delegasyon sa dakbayan sa Malaybalay alang sa gipaabot nga Street Dancing Competition sa umaabot nga Kaamulan Festival ubos sa pagdumala ni Mayor Warren Jay Pabillaran.
Sa pakighinabi sa Bombo Radyo Malaybalay kang Giancarlo S. Neri, sakop sa technical group, gikumpirma niini nga ang dul-an sa 300 ka mga delegado, nga gilangkuban sa mga empleyado sa gobyerno, seryosong nagbansay sulod sa kapin duha ka bulan sugod pa niadtong Enero 15.
Dugang pa niini, tungod kay kadaghanan sa mga partisipante giisip nang mga “veterans” o anad na sa maong tinuig nga kalihokan, mas nahimong hapsay ang ilang pagpangandam alang sa kompetisyon karong Abril 18.
Gipasalamatan usab sa grupo ang suporta ni Provincial Director PCol. Oliver S. Navales sa pagtugot kanila nga makagamit sa PNP grounds isip ilang practice area.
Isip kasamtangang kampeon, tinguha sa Malaybalay City nga depensahan ang ilang titulo ug ipakita ang kalig-on sa ilang kultura pinaagi sa mabulukong sayaw.
Nanawagan si Neeri sa tanang katawhan sa dakbayan sa paghatag sa ilang suporta ug pag-ampo alang sa kalampusan ug kaluwasan sa tibuok delegasyon.