Nagpahayag ang defense team ni Vice President Sara Duterte nga wala na sila natingala sa resulta sa House Committee on Justice nga nakakaplag og probable cause batok sa Bise Presidente, base sa dalan sa mga miaging pagdungog.
Sumala sa kampo sa depensa, magpabilin sila sa baruganan nga ang proseso sa komite malahi na sa disenyo sa Konstitusyon, nga imbis nga magpabilin sa verified complaints ug mga kalakip niini, matud nila nga gipalapad pa ang diskusyon ngadto sa mga isyu nga mas angay unta hisgutan sa full trial stage.
Sa botasyon kagahapong adlawa, nakaplagan sa komite ang probable cause sa impeachment complaint batok kang VP Duterte.
Ang mga alegasyon naglakip sa misuse sa confidential funds, unexplained wealth, ug giingong death threats batok sa Presidente, First Lady, ug kanhi House Speaker.
Sa mga naunang hearing, gipresentar sa Anti-Money Laundering Council (AMLC) ang report nga nagpakita og ₱6.7 bilyon nga transaksyon nga wala nagtupong sa SALN sa magtiayon.
Kung maaprubahan sa plenaryo sa Kamara, ang impeachment case mopadayon ngadto sa Senate of the Philippines alang sa pormal nga impeachment trial.