Nakadaog og bronze medal si Pi Durden Wangkay sa men’s 200-meter final sa 4th Youth Olympic Games sa Dakar, Senegal, human makarekord og personal best nga 21.36 segundos.
Nalabwan ni Wangkay ang iyang kaugalingong national records sa U18 ug U20 nga 21.40 segundos, nga iyang natala sa PATAFA Weekly Relays niadtong miaging bulan.
Nakuha ni Ropafadzo Mizondo sa Zimbabwe ang gold medal sa 21.04 segundos, samtang silver medal ang nasakmit ni Deuquan Farrell sa Guyana pinaagi sa photo finish bisan pareho sila og oras ni Wangkay.
Miangkon si Wangkay nga wala niya damha ang pagdaug og medalya tungod sa hugot nga kompetisyon sukad pa sa semifinals, diin nahimutang siya sa ikalima nga puwesto ug nakarekord og 21.96 segundos.
Ikaduhang medalya na kini sa Pilipinas sa maong kompetisyon, human makadaog og silver si Naomi Cesar sa women’s 800-meter event.