Gipahigayon karon sa Confraternity of the New Apologetics ang mas gihingusgan nga kampanya aron dasigon ang kabatan-onan sa Region 10 nga magpabiling aktibo sa ilang pagtuo ug espirituhanong kalihokan, taliwala sa nagkadaiyang distraksyon gikan sa social media ug digital nga kalingawan.
Sumala ni Cleb B. Calimutan, ang presidente sa maong kapunongan, usa ka dakong hagit karon ang pagkuha sa atensyon sa mga batan-on tungod sa modernong lifestyle. Tungod niini, gikinahanglan ang dugang paningkamot aron madani sila sa pagsalmot sa mga kalihokan sa simbahan. Isip kabahin sa ilang programa, nag-organisar ang grupo og monthly gatherings nga bukas alang sa mga Katoliko ug bisan sa mga dili-Katoliko, diin gi-integrate ang faith dimension sa ilang mga aktibidad.
Bag-ohay lang, nakapartisipar usab ang grupo sa Federation of Archdiocesan Youth sa Cagayan de Oro, diin ilang gipakita ang suporta sa pagpalapad sa espirituhanong impluwensya ngadto sa ubang kabatan-onan sa rehiyon.
Bisan pa man sa gamay nga gidaghanon sa ilang aktibong mga sakop—nga moabot sa 20 ka batan-on—gipasiugda ni Calimutan nga aktibo sila sa pagpangulo ug paghatag og maayong ehemplo sa uban pang youth organizations. Tumong niini nga mas mapalig-on pa ang pagtuo sa kasamtangang henerasyon ug madala ang dugang kabatan-onan balik sa sabakan sa simbahan.