Hingpit nga gisalikway ni Department of Public Works and Highways (DPWH) Secretary Manuel Bonoan ang nagkaylap nga alegasyon sa social media kabahin sa unom ka mga kongresista nga nalambigit sa mga proyekto sa flood control diin nakakuha matud pa og P800 bilyon nga kantidad sa maong budget.
Gipasiuggdahan ni Senior Deputy Speaker David “Jay-jay” Suarez ang isyu, nga nagtumong sa usa ka viral nga Facebook post nga gikaingong adunay pipila ka kongresista ang nagmaniobra sa pondo alang sa ilang kaugalingong interes.
Apan sa usa ka pamahayag sa House Committee on Public Accounts, gitawag ni Bonoan ang maong pasangil nga “preposterous” o hilabihan ka kataw-anan ug walay kamatuoran, atol sa panaghisgot sa mga programa sa ahensya.
Gumikan niini, direktang gipangutana ni Ako Bicol Rep. Alfredo Garbin Jr. si Bonoan kabahin sa nasangpit nga alokasyon, apan mitubag si Bonoan ug gihimakak niini ang impormasyon sa unom ka mambabalaod.
Gipasiugda usab ni Committee Chair ug Bicol Saro Party-list Rep. Terry Ridon, nga dili gikan sa usa ka lehitimong media outlet ang alegasyon, kondili gikan lamang sa usa ka blog post sa social media.
Gipasalig ni Suarez nga seryoso ang Kongreso sa pag-atubang sa maong isyu, labi na nga parte kini sa ilang katungdanan sa pagbantay sa paggasto sa mga proyekto sa imprastruktura, subay sa panawagan ni Presidente Marcos sa iyang State of the Nation Address.
Matud ni Suarez, dili tugotan sa Kongreso nga madaot sa sayop nga impormasyon ang pagsalig sa publiko sa mga institusyon.
Ang maong pagdungog kabahin sa pormal nga pag-review sa Kamara sa mga proyekto sa flood control ug drainage systems ilawom sa DPWH Unified Project Management Office, Flood Control Cluster.
Kini nga pasusi gihimo isip tubag sa grabe nga pagbaha sa nagkalain-laing dapit sa nasud, nga nagpakita sa kamahinungdanon sa hapsay, epektibo, ug matinud-anong pagplano sa imprastruktura.
Giatiman karon sa mga mambabalaod sa Kamara ang performance, paggamit sa pondo, ug mga mekanismo sa oversight, subay sa panawagan sa Presidente nga tapuson ang mga “ghost projects,” kurapsyon, ug ubos nga kalidad sa mga proyekto sa gobyerno.