Kapin sa ₱2.48 milyones nga balor sa iligal nga droga, kapin ₱1.35 milyones nga smuggled cigarettes, ug 34 ka wanted persons ang nasikop sa sunod-sunod nga operasyon sa kapulisan sa probinsya sa Bukidnon sulod lamang sa bulan sa Disyembre.
Sa pakighinabi sa Bombo Radyo Malaybalay, gipadayag ni PCpt. Sheila Joy P. Jangad, tigpamaba sa Bukidnon Police Provincial Office, nga ang PNP-Bukidnon maoy nagpatuman sa nagkalain-laing operasyon sa tibuok Bukidnon ning Disyembre, aron masiguro ang kalinaw ug kahusay ilabi na sa holiday season, pinaagi sa hugot nga anti-criminal operations.
Gipadayag usab nga 28 ka buy-bust operations ang naugna ug nakumpiska niini ang 325.64 gramos sa shabu nga nagkantidad og ₱2.48 milyones; napulo ka operasyon batok smuggled cigarettes nga mitultol sa 12 ka pagdakop ug pagkasakmit sa kapin ₱1.35 milyones nga balor sa sigarilyo; samtang 34 ka wanted persons, lakip ang duha ka most wanted, ang nadakpan sa lain-laing police operations.
Gipasalig sa Bukidnon Police Provincial Office nga magpadayon ang heightened alert status, police visibility, checkpoints ug deployment sa mga kapulisan sa mga simbahan atol sa Simbang Gabi aron masiguro ang luwas ug malinaw nga pagsaulog sa Pasko sa tibuok Bukidnon.