Gipadayag ni Tingog Party-list Representative Jude Acidre ang mga giingong kalainan sa deklarasyon sa mga propyedad nga nalambigit kang Vice President Sara Duterte, base sa testimonya sa unang testigo sa depensa atol sa impeachment trial kagahapong adlawa.
Matud ni Acidre, imbes nga mapalig-on ang mga ebidensya sa depensa, mas napakita hinuon sa testimonya ni Davao City Assessor Engineer Jaime Adalin ang mga kalainan sa mga rekord nga may kalabotan sa propyedad.
Gipunting ni Acidre nga adunay mga dili tukmang detalye sa deklarasyon sa propyedad, lakip na ang pag-angkon nga usa ra kini ka propyedad.
Dugang pa sa kongresista, dili magkatakdo ang kantidad nga makita sa resibo ug ang acquisition cost nga gilista sa Statement of Assets, Liabilities and Net Worth o SALN sa bise presidente Gibutyag usab ni Acidre nga wala matud pa’y lot number o deklarasyon nga makapamatuod nga ang propyedad nga gihisgotan sa testigo mao gayud ang mao gihapong propyedad nga gilista sa SALN.
Samtang, gikuwestiyon usab ni Acidre ang kredibilidad sa testigo, ilabina sa iyang mga tubag atol sa cross-examination sa prosekusyon.
Matud ni Acidre, importante ang maong testimonya sa pagtino sa kredibilidad ni Engineer Adalin, ug namatikdan niya nga dili ingon ka sigurado ang mga tubag niini atol sa pagpangutana sa prosekusyon.