Usa ka Republican nga mambabalaod ang pormal nga nagpasaka og impeachment proceedings batok kang United States Defense Secretary Pete Hegseth, usa ka lakang nga nagpabuto sa usa ka politikanhong bomba sa Washington human sa agresibong kampanya sa gubat sa kalihim batok sa Iran.
Si Kentucky Rep. Thomas Massie, niadtong Lunes, Nobyembre 9, nagpresentar og walo ka ‘articles of impeachment’ nga nag-akusar kang Hegseth sa pagdeklarar og gubat nga walay pagtugot sa Kongreso ug sa pag-abuso sa iyang posisyon isip Pentagon chief.
Ang maong mga artikulo nagkutlo sa giingong paglapas ni Hegseth sa 1973 War Powers Resolution, lakip na ang iyang pagkalambigit sa mga sibilyan ug operasyon sa militar sa Yemen ug Venezuela.
Apan, hugot nga gipanghimakak sa Pentagon ang tanang pasangil, ug gitawag pa gani si Massie nga usa ka “disgruntled congressman”.
Sa pikas bahin, si US President Donald Trump mibarog sa iyang kalihim, gipasiugda ang giingong kalampusan ni Hegseth sa gubat batok sa Venezuela niadtong Enero ug ang walo ka bulan nga panagsangka batok sa Iran.
Bisan pa sa suporta sa presidente, pipila ka Republican nga mambabatas ang nagpahayag sa posibilidad nga mosuporta sa mga Democrats, lakip na ang mosyon ni Massie, batok sa kalihim.
Kini nga kalamboan miulbo human sa ‘midterm sweep’ sa mga Democrats sa miaging eleksyon, diin ang Kongreso sa US daw ‘gikoloran og asul’ tungod sa kasagmuyo sa mga botante sa pagsaka sa presyo sa lana nga konektado sa gubat sa Iran.
Ang maong kasagmuyo sa publiko maoy nakahatag og dugang kadasig sa impeachment drive batok kang Hegseth.
Ang pagbotar sa mga solon sa impeachment resolution batok sa maong kalihim gikatakda nga magsugod karong Miyerkules.