Tulo ka armas, boluntaryong gitugyan sa usa ka 20-anyos nga lalaki ngadto sa kapulisan sa Talakag, Bukidnon

Boluntaryong gitugyan sa usa ka 20-anyos nga estudyante ang tulo ka wala marehistrong armas ngadto sa mga personahe sa 1004th Maneuver Company sa Barangay Indulang, Talakag, Bukidnon, sa alas 3:45 sa hapon niadtong milabay’ng adlaw.

Ang mga armas naglangkob sa duha ka kalibre .38 ug usa ka kalibre .22 nga revolver, nga walay mailhang marka, modelo ug serial number.

Matud sa estudyante, aksidente niyang nadiskubrehan ang mga armas sulod sa kabinet sa iyang uyoan ug nakahukom nga itugyan kini sa kapulisan tungod sa kabalaka sa legal nga sangpotanan sa pagpanag-iya og wala marehistrong armas.

Sa pagkakaron, anaa sa temporaryong kustodiya sa 1004th Maneuver Company ang mga armas alang sa dokumentasyon ug hustong pagsusi.