Nag-andam na ang Commission on Audit (COA) sa pag-amenda sa Joint Circular No. 2015-01 aron pahugtan ang mga lagda sa paggamit ug pag-audit sa confidential ug intelligence funds.
Matud ni COA Commissioner Douglas Michael Mallillin sa Senate budget hearing, kinahanglan ang mas lig-on nga ebidensya sa kalampusan sa mga intelligence operations imbes nga magsalig lang sa mga acknowledgment receipt.
Gihimo kini sa COA taliwala sa impeachment trial batok kang Vice President Sara Duterte bahin sa alegasyong anomalya sa paggamit sa ₱612.5 million nga confidential funds sa OVP ug Department of Education.
Subay niini, gikwestyon usab ni Senador Erwin Tulfo ang status sa maong mga pondo ug unsa na ang gidangatan sa mga gigasto niini.
Gitubag kini ni COA Chairman Gamaliel Cordoba nga wala nila tuguti ang appeal sa Office of the Vice President bahin sa mga Notice of Disallowance, apan nagsumite ang OVP og motion for reconsideration.
Gipasabot usab niini nga kung balibaran o denied gihapon ang motion for reconsideration, pwedeng mosaka ang kampo sa Bise Presidente sa Supreme Court.