Gipadayag ni House prosecution spokesperson Zia Alonto Adiong nga anaa sa gitawag nga “echo chamber” ug “parallel reality” ang mga diehard supporters ni Vice President Sara Duterte.
Matud ni Adiong, dili na lauman sa prosecution nga dawaton pa sa mga supporter ni Duterte ang mga ebidensiya ug testimonya nga gipresentar sa impeachment trial.
Tumong sa prosecution nga ipakita sa mas daghang Pilipino ang kamatuoran base sa mga ebidensiyang gilatag sa Senado.
Giingon ni Adiong nga adunay igo ug lig-on nga ebidensiya aron mapakita ang giingong pagbudhi sa pagsalig sa katawhan, ilabina sa isyu sa paggamit ug liquidation sa confidential funds ni Duterte.
Matud niya, kinahanglan ipasabot kung asa gikan ang pondo, giunsa kini paggasto ug nganong wala kini hustong ma-liquidate o mapatin-aw.
Gipasabot usab niya nga nagpabilin kang Vice President Sara Duterte ang responsibilidad sa mga pondong gikuwestiyon sa impeachment trial.