Gipahugtan sa Impasug-ong Municipal Police Station (MPS) ang seguridad ug police visibility sa mga tunghaan sa lungsod human makumpiska ang mga kutsilyo ug uban pang peligrosong kagamitan gikan sa bag sa usa ka Grade 7 nga estudyante sa Impasug-ong National High School. Sa pakighinabi sa Bombo Radyo Malaybalay kay Impasug-ong MPS Chief PCpt. Keir Jhon R. Hallasgo, gipahayag niini nga gidungagan na niini ang pagpatrolya sa mga eskwelahan, ilabi na sa oras sa pagsulod ug paggawas sa mga estudyante.
Nakigtambayayong usab ang kapolisan sa pamunoan sa eskwelahan ug sa Municipal Social Welfare and Development Office (MSWDO) alang sa saktong pagdumala sa maong minor de edad, diin gipahibalo na usab ang mga ginikanan niini.
Gidugang ni Hallasgo nga maskin walay nadawat nga report sa pagpanghulga o cyberbullying, nagpadayon gihapon ang ilang regular nga checkpoints ug koordinasyon sa mga force multipliers sa mga barangay, ilabi na sa mga hilit nga dapit.
Gipasalig sa kapolisan ang kaluwasan sa tanang estudyante ug magtutudlo samtang giawhag ang komunidad sa pag-report sa bisan unsang kaduda-dudang kalihokan.