Nakurat ug nalingaw ang daghang netizens mahitungod sa istorya sa usa ka engineer sa Cádiz, Spain, nga nakadawat gihapon og sweldo sulod sa daghang katuigan bisan dugay nang wala motunga sa iyang trabaho.
Ang maong empleyado mao si Joaquin Garcia, nga nakadawat og tinuig nga sweldo nga mokabat sa 37,000 euros o kapin P2.2 milyon.
Nadiskubrehan ang iyang dugay nga pagkawala sa dihang giplanong hatagan kini og service award alang sa iyang 20 ka tuig nga serbisyo.
Apan wala siya makita sa mga opisyal ug sa ilang pag-usisa, nasuta nga labing menos unom na ka tuig siyang wala nagreport sa opisina. Aduna usab mga report nga mahimong mokabat pa sa 14 ka tuig ang iyang pagkawala sa trabaho.
Sa iyang depensa, miingon si Garcia nga nagtrabaho gihapon siya, apan dili regular ang iyang oras. Giangkon usab niini nga nakaagi siya og problema sa workplace ug bullying.
Misamot ang kontrobersiya human migawas nga adunay kalibog tali sa municipal water company ug city council kung kinsa ang responsable sa pagdumala ug pagmonitor sa iyang trabaho.
Sa ulahi, gikasuhan si Garcia ug gipamulta og 27,000 euros o kapin P1.6 milyon tungod sa iyang dugay nga pagkawala sa trabaho samtang padayon nga nakadawat og sweldo.
Bisan pa sa kataw-anan nga reaksyon sa mga netizens, nahimong pahimangno ang insidente bahin sa importansya sa accountability sa mga empleyado ug sa responsibilidad sa management sa hustong pagmonitor sa attendance ug performance sa ilang mga kawani.