Subling gisuspinde sa Energy Regulatory Commission o ERC ang singil sa P0.0371 matag kilowatt-hour nga Green Energy Auction Allowance o GEA-All charge alang sa mga billing month sa Septyembre hangtod Disyembre 2026.
Una nang gisuspinde sa ERC ang maong singil alang sa Mayo ug Hunyo ug gipalawig kini alang sa Hulyo ug Agosto. Ang GEA-All usa ka regular nga singil sa mga konsumidor nga gigamit sa pagpondo sa bayad ngadto sa mga renewable energy developer nga misalmot sa Green Energy Auction Program sa gobyerno.
Matud sa ERC, kapin P556.9 milyon pa ang nahibiling pondo sa GEA-All Fund niadtong Agosto 5, nga igo matud pa aron matubag ang gibana-banaang binulan nga bayranon sa mga kwalipikadong renewable energy developer, lakip na ang tulo ka bag-ong planta nga gilauman nga makasulod sa programa.
Tumong sa suspensyon nga mapagaan ang gasto sa mga konsumidor, ilabina ang mga pamilyang nag-atubang sa taas nga presyo sa mga palaliton ug uban pang panginahanglanon.