Gipusil-patay ang usa ka mayor sa sentral nga bahin sa Mexico sulod mismo sa ilang municipal hall, pipila ka bulan human usab kini nakaluwas sa usa ka pagsulay sa pag-patay kaniya.
Gikumpirma sa opisina sa state prosecutor nga napalgan ang wala na’y kinabuhi nga lawas ni Mayor Valentin Lavin sulod sa mga pasilidad sa lokal nga kagamhanan sa lungsod sa Temoac, rehiyon sa Morelos—usa ka dapit duol sa Mexico City diin aktibo ang pipila ka sikat nga drug cartel.
Unang nakaluwas si Mayor Lavin, nga kaalyado sa partido ni Mexican President Claudia Sheinbaum, sa usa ka armed assault niadtong Enero. Sa pagkakaron, nagpadayon ang lapad nga operasyon sa kapolisan ug forensic investigators aron mailhan ug madakpan ang mga responsable sa maong pagpamatay.
Sumala sa opisyal nga datos sa gobyerno, hapit na sa 100 ka mga mayor ang gipatay sa Mexico sukad niadtong 2006 taliwala sa nagkagrabe nga karahasan nga nalambigit sa mga drug cartel sa nasod.