Giangkon sa rebeldeng grupong Houthi sa Yemen ang pagpangatake gamit ang mga missile ug drone batok sa duha ka oil tanker sa Saudi Arabia didto sa Red Sea, taliwala sa ilang gipahamtang nga naval blockade.
Giila sa Houthi ang duha ka barko nga mao ang Encelia ug Layla. Sumala sa ilang tigpamaba nga si Yahya Saree, gihimo ang maong pag-atake tungod sa matod pa paglapas sa maong mga barko sa gipatuman nilang maritime embargo batok sa mga sasakyang pandagat nga duna’y koneksyon sa Saudi Arabia.
Kumpirmado sa Saudi Press Agency nga naigo ang barkong Encelia, nga nagpahinabo og sunog sa unahang bahin (bow) niini. Bisan pa man og wala pa’y hingpit nga detalye sa kadaot sa ikaduhang barko nga Layla, gipahibalo sa mga otoridad nga luwas ang tanang mga crewman ug wala’y naangol sa maong insidente.
Tungod sa nagpadayong pagpangatake sa maong estratehikong agianan sa dagat, nagpabilin ang kabalaka sa posibleng pag-uswag usab sa presyo sa lana sa kalibotanong merkado.