Misaka na ngadto sa 13 ka kaso sa Andes hantavirus ang natala sa tibuok kalibutan, diin tulo na niini ang nakalas, subay sa labing ulahing taho sa World Health Organization (WHO).
Sa maong ihap, 11 ka kaso ang kumpirmado sa laboratoryo samtang duha ang giisip nga probable cases, nga naghatag og case fatality ratio nga 23 porsyento.
Kini na ang ika-upat nga opisyal nga report kalabot sa maong outbreak nga may kalambigitan sa biyahe sa cruise ship nga M/V Hondius, human unang gipahibalo sa WHO niadtong Mayo 2 ang mga kaso sa grabe nga sakit sa respiratoryo sulod sa maong barko.
Gikan sa katapusang taho niadtong Mayo 13, tulo ka bag-ong kumpirmadong kaso ang nadugang gikan sa mga nasud sa Canada, Netherlands, ug Spain.
Samtang, ang usa ka kaso sa Estados Unidos nga giingong inconclusive kaniadto, opisyal nang gikuha sa listahan human migawas nga negatibo ang resulta niini. Nasayran nga ang tanang biktima gilangkuban sa mga pasahero ug mga crew sa maong barko.
Gilauman usab nga aduna pay dugang mga kaso nga motumaw sa mosunod nga mga adlaw tungod kay ang maong virus adunay taas nga incubation period nga muabot ngadto sa unom ka semana.