Hugot nga gipadayag sa mga konsumante sa Primewater sa dakbayan sa Malaybalay ang ilang dako nga kahiubos ug reklamo batok sa maong kompanya sa tubig tungod sa giingong palpak ug walay klaro nga serbisyo niini nga milungtad na og pipila ka tuig.
Sa usa ka pakighinabi, gibutyag ni Reyneth Namuag, usa sa mga apektadong residente ug konsumante sa Primewater partikular sa Barangay Cabangan, nga nahimo nang dakong kalbaryo ang ilang sitwasyon sa tubig.
Sumala niini, kaisa ra sila hatagan og rasyon sa tubig sa matag duha ka semana, butang nga dili paigo alang sa ilang inadlaw-adlaw nga panginahanglan.
Dugang pa niini, gipadayag sa maong konsumante nga bisan pa og aduna kini pito ka mga drum nga pondohan sa tubig, kulang gihapon kini aron masustentuhan ang ilang panginahanglan sa tibuok pamilya sulod sa duha ka semana.
Gisaysay usab niini ang problema sa dugang galastuhon sa pagpalit og tubig nga nakapanimo doble ang bayaran matag bulan.
Sa pikas bahin, gipaambit usab sa Kapitan nga si Edwin Lara sa maong barangay ang iyang pagkadismaya kabahin sa serbisyo sa maong buhatan.
Matud sa Kapitan nagtuo kini nga labwan pa sa Primewater ang maayong performance water district ning dakbayan apan nahimong perwisyo na hinuon kini sa katawhan.