Usa ka patay’ng lawas sa wala pa mailhing lalaki ang nakaplagan sulod sa usa ka sabungan sa Barangay Casisang, ning dakbayn, karong buntaga, Oktubre 6.
Nakit-an kini nga nagbuy-od duol sa mga kulongan sa manok diin gituohang aksidenteng nahulog kini ug nabali ang liog. Wala siyay ID o dokumento nga makatabang sa pag-ila sa iyang pagkatawo.
Gidala na ang patay’ng lawas niini sa punerarya sa dakbayan samtang nagpadayon ang imbestigasyon sa kapulisan samtang nanawagan sa publiko nga adunay impormasyon bahin sa biktima nga makig-coordinate sa pinakaduol nga estasyon sa pulisya.
Sa pikas bahin, nakaplagan usab nga patay ang 55-anyos nga lalaki sa dapit sa sapa sa boundary sa Barangay Santo Niño ug Barangay Simaya, Malaybalay City, human kini gikatahong nawala sulod sa lima ka adlaw.
Giila ang biktima nga si Nicanor Nocol Paglomotan, residente sa Barangay Santo Niño, nga nawala niadtong Huwebes sa alas 9 sa gabii samtang natulog ang iyang asawa ug mga anak.
Matud sa asawa, naalarma kini sa dihang wala na ang iyang bana ug gilayon nga gipahibalo ang barangay, diin gisugdan dayon ang pagpangita niini.
Nakaplaganang lawas sa biktima pasado alas 8 sa buntag kagahapong adlawa sa Barangay Simaya, diin duol niini nakit-an usab ang iyang tsinelas.
Gibutyag usab sa asawa nga adunay dugay nang problema sa mental health ang biktima ug kapin upat na ka tuig kining gipailawom sa medikasyon. Wala usab kini nagdala og gamit sa dihang migawas sa ilang balay.