Gikuwestiyon sa prosekusyon ang ₱98 milyon nga net worth nga gideklarar ni Vice President Sara Duterte tungod sa dagkong transaksiyon nga nalambigit sa iyang mga account ug hiniusang account.
Sa pakighinabi sa Bombo Radyo Mindanao ngadto kang Tingog Partylist rep. Jude Acidre sa prosecution, gibulgar niini nga lakip sa ilang gikonsidera ang kapin ₱193 milyon nga mga pagbalhin sa hiniusang account nga nalambigit kang VP Sara niadtong 2014.
Matud niini nga ang maong kantidad importante aron masuta kung husto ba ang pagdeklara sa iyang mga kabtangan ug net worth.
Gikuwestiyon usab sa prosekusyon ang pagkunhod sa gideklara nga net worth ni VP Sara bisan pa sa mga dagkong transaksiyon nga ilang nakita sa mga rekord.
Dugang pa niini, ang mga rekord mahimong gamiton aron masubay ang tinubdan sa kuwarta ug matandi kini sa mga deklarasyon matag tuig.
Apan alang sa prosekusyon, mas dakong pangutana ang katukma sa pagdeklarar sa net worth, ilabi na kon itandi sa gidaghanon sa mga transaksiyong makita sa mga rekord.