Pilipinas mag-host og duha ka WTA tournament sa sunod tuig

Gipahibalo sa Philippine Tennis Association o PHILTA nga napili ang Pilipinas isip host sa duha ka Women’s Tennis Association o WTA tournaments sa sunod tuig.

Kini human giaprobahan sa WTA ang hosting application sa PHILTA. Giplanong ipahigayon ang WTA 125 sa Enero, human sa ikaduhang semana sa Australian Open, samtang ang WTA 250 posibleng ipahigayon tali sa Oktubre ug Nobyembre.

Matud sa PHILTA, dako ang ilang kalipay sa pag-apruba sa WTA sa Pilipinas isip host.

Niadtong Enero, gipahigayon sa nasud ang WTA 125 Philippine Women’s Open diin miapil si Filipina tennis player Alex Eala.