Giingon sa prosecution panel nga si Vice President Sara Duterte ra kuno ang makahatag og katin-awan sa ₱4.4 bilyon nga financial transactions nga nalambigit kaniya, sa iyang bana ug sa ilang mga kompanya.
Gibase sa prosecution ang maong kantidad sa mga rekord sa Anti-Money Laundering Council o AMLC, nga naglangkob sa financial inflow ug outflow sa mga account ug kompanya nga nalambigit sa magtiayon.
Matud sa panel, wala kini makita sa mga SALN ni Duterte, samtang giingon usab sa AMLC nga dili niini maipasabot ang pipila sa mga transaksyon.
Gipunting usab sa prosecution ang giingong wala pagdeklarar sa maong financial activity sa SALN.
Samtang, gipakita sa AMLC records nga gikan 2022 hangtod 2025, adunay 171 covered transaction reports ug 49 suspicious transaction reports nga mikabat sa ₱424.18 milyon.
Gikuwestiyon usab ang ₱776 milyon nga money inflow sa Callie 88 Foods Corporation bisan ₱125,000 lamang ang kapital niini.