Patay ang usa ka tulo ka tuig nga bata human naanod sa kusog nga dagan sa tubig ug nalumos sa kanal diha sa Purok 25, Santa Cruz, Barangay Casisang, dakbayan sa Malaybalay atol sa kusog nga pag-ulan.
Subay sa pahayag ni Barangay Casisang Kapitan Gregorio D. Jaroy, gikataho ang pagkawala sa bata alas tres sa hapon diin gilusad dayon sa mga Barangay Public Safety Officer (BPSO) ang pagpangita. Nakaplagan ang biktima pipila ka minuto ang nakalabay nga nasangit sa kawayanan sa maong kanal—gibana-banang usa ka kilometro ang gilay-on gikan sa ilang panimalay—ug bisan pa man sa pag-revive niini, wala na gyud kini maluwas.
Gituohang naanod ang bata gikan sa ilang panimalay paingon sa kanal tungod sa kusog nga ulan, diin ang tubig misaka sa mga kanal nga duol sa ilang lugar. Mokabat usab sa usa ka kilometro ang gilay-on gikan sa ilang balay hangtod sa dapit diin kini nakaplagan.
Tungod sa maong trahedya, hugot nga nagpahimangno si Kapitan Jaroy sa tanang mga ginikanan nga hugtan ang pagbantay sa ilang mga gagmay’ng anak, ilabi na niining panahon sa ting-ulan, aron malikayan ang pagduol ug pagdula sa mga peligroso nga kanal ug kasapaan.