Dako ang kalipay ug paglaum sa mga operator ug drayber sa Bao-bao sa Malaybalay City human nakadawat og kasiguraduhan sa pagkalegalisa sa ilang pagpamasahero pinaagi sa pagpasa sa ikaduhang pagbasa sa ordinansa sa Sangguniang Panlungsod. Subay kang Romavic Lamujer, presidente sa Malaybalay City Federation of Bao-bao and Tricab Operators and Drivers Association (MCFBTODA), resulta kini sa halos usa ka tuig nilang paningkamot nga maorganisa ug malegalisa ang ilang panginabuhian.
Gibutyag ni Lamujer nga sobra na sa 500 ka mga drayber ang na-profile alang sa akreditasyon sa Department of Labor and Employment (DOLE). Ubos sa maong balaodnon, ipatuman ang color coding ug identification numbers alang sa matag gitudlo nga designated area sa operasyon, ingon man ang pagpalawig sa validity sa franchise ngadto sa tulo ka tuig nga dako’g tabang aron makadaginot sa bayronon sa permit.
Tungod niini, gipasalamatan sa pederasyon ang lokal nga konseho, si Mayor Warren Pabillaran, coordinator Noly Cabilas, ug ang Motorrela Federation sa ilang pakigtambayayong aron masiguro ang hapsay, luwas, ug organisadong pampublikong transportasyon sa dakbayan.