VALENCIA CITY, BUKIDNON — Miboluntaryong mitugyan sa kapolisan ang usa ka 55-anyos nga lalaki pila ka oras human niya gipusil ug gipanglabay og bato ang iyang 65-anyos nga magulang tungod sa ilang pag-away bahin sa kahoy nga Gmelina sa Purok 5B, Barangay Kahaponan, Valencia City, Bukidnon niadtong Hulyo 17 sa hapon.
Subay sa report nga gidawat ni Bukidnon PPO Provincial Director PCOL Oliver Sotto Navales gikan sa Valencia City Police Station, nagsumikad ang away sa duha ka magsuon dihang giputol sa magulang ang gitanom nga kahoy nga Gmelina sa iyang manghod aron himuong kuptanan sa ilang poso (deep well). Pagka-ugma sa udto, samtang nagpahuway ang magulang sa gawas sa iyang balay, giduol kini sa suspek ug gipusil sa makadaghang higayon diin naigo kini sa iyang tuo nga bukton, una pa kini giingong gipanglabayan usab og mga bato.
Dali nga gidala ang biktima sa Polymedic General Hospital diin anaa na kini sa luwas ug stable nga kahimtang. Pag-abot sa alas-9:00 sa gabii sa samang adlaw, mitugyan ra usab ang suspek sa Valencia CPS sa tabang sa usa ka Barangay Kagawad ug andam nga moatubang sa kaso batok kaniya.