4 ka bag-ong tigpayuhot sa ilegal nga droga, sikop sa gikasang drug buy-bust operation sa Purok 7, Barangay Dologon, Maramag, Bukidnon niadtong Abril 11, 2026, mga alas 1:11 sa hapon.
Base sa report gikan sa Bukidnon Police Provincial Office (BPPO), ang mga dinakpan giila lamang sa mga alyas nga: Madam, 26-anyos; Reyrey, 28; Nonoy, 45; ug Boyak, 23-anyos—nga pulos giila isip mga bag-ong personalidad sa gidiling droga. Ang maong operasyon gipahigayon sa mga operatiba sa Maramag Municipal Police Station ubos sa pagpanguna ni PLTCOL Alexander E. Eugenio, kauban ang 2nd Bukidnon PMFC ug sa koordinasyon sa Provincial Intelligence Unit.
Atol sa maong transaksyon, narekober gikan sa posisyon sa mga suspek ang nagkadaiyang sachet sa gituohang shabu nga duna’y kinatibuk-ang gibug-aton nga 1 gramo ug gibanabanang duna’y standard drug price nga ₱6,800. Lakip sa mga nasakmit nga ebidensya mao ang ₱500 nga marked money, usa ka Vivo nga cellphone, ug uban pang kagamitan sa pag-repack sa ilegal nga droga.
Sa pagkakaron, ang upat ka suspetsado anaa na sa kustodiya sa Maramag MPS alang sa saktong dokumentasyon samtang gihan-ay na ang kasong paglapas sa Sections 5 ug 11, Article II sa Republic Act 9165 o ang Comprehensive Dangerous Drugs Act of 2002. Ang mga nakumpiskang ilegal nga droga gidala na sa Provincial Forensic Unit alang sa laboratory examination.