Gipasalig ni Metropolitan Manila Development Authority (MMDA) Chairman ug kanhi Philippine National Police (PNP) Chief Nicolas Torre III ang bug-os nga kooperasyon sa MMDA sa padayong imbestigasyon sa Department of Justice (DOJ) kalabot sa giingong paggawas ni Senador Ronald “Bato” dela Rosa gikan sa Senado.
Kini human mihangyo ang DOJ sa MMDA sa mga CCTV footage sa palibot sa Senado sa Pasay City niadtong Mayo 14, diin giingong migawas si Dela Rosa alas dos sa kadlawon.
Matud ni Torre, andam ang ilang ahensya sa paghatag sa tanang impormasyon nga gikinahanglan sa mga imbestigador isip kabahin sa proseso ug obligasyon sa mga ahensya sa gobyerno nga makigtimbayayong.
Gipasiugda usab niya nga walay katungod ang mga law enforcers sa pagpili kung unsang warrant ang ilang ipatuman, gumikan obligasyon sa kapulisan ang pagsunod sa balaod ug proseso, dili ang paghukom sa kaso.
Samtang, gipadayag usab ni ICC-accredited lawyer nga si Atty. Ramses Villagonzalo nga kinahanglan una dalhon si Senador Dela Rosa sa pinakaduol nga Regional Trial Court o competent judicial authority sa oras nga madakpan kini una pa siya i-turnover ngadto sa International Criminal Court.
Gipasabot ni Gonzalo nga ubos sa Article 59 sa Rome Statute, kinahanglan masiguro sa lokal nga korte nga legal ang pag-aresto, nasunod ang Miranda Rights, ug walay paglapas sa tawhanong katungod samtang anaa sa kustodiya ang akusado.