Gidagsa sa mga tawo ug social media fans ang usa ka umahan sa Narayanganj, Bangladesh, aron makita ug magpicture sa usa ka talagsaong albino nga kabaw. Kining 700 ka kilo nga mananap nahimong online sensation tungod sa talagsaon niining blond nga buhok nga mala US President Donald Trump ang signature look.
Sumala sa tag-iya nga si Zia Uddin Mridha, ang iyang manghod maoy nadasig sa paghingalan sa kabaw nga Donal Trump gumikan sa bagtok ug bag-o niining “helmet of hair” nga nikuha sa atensyon sa publiko.
Tungod sa iyang pagka-sikat karong bulana, nakatagamtam ang kabaw og espesyal nga pag-atiman sama sa pagpaligo niini sa kaupat ka higayon sa usa ka adlaw.
Gawas niini, ginasudlay pa sa mga tig-atiman ang iyang blond nga combover gamit ang usa ka pink nga brush.
Gipasabot usab sa mga eksperto sa livestock department nga talagsaon kining maong matang sa albino nga kabaw kay aduna man kini kakulang sa melanin production nga maoy hinungdan sa iyang puti ug pink nga panit.
Bisan pa man sa dakong kasikat niini sa internet, pipila na lang ka adlaw ang nahabilin sa kinabuhi sa maong mananap kay nakatagana na kini nga isakripisyo alang sa usa ka umaabot nga pista.