Magpabilin nga nakadetine sa The Hague, Netherlands ang kanhi Pangulong Rodrigo Duterte samtang naghulat sa pagsugod sa iyang pagdungog sa kasong crimes against humanity, sumala sa International Criminal Court (ICC).
Gipasiugda sa ICC Trial Chamber III nga dili igo ang mga argumento sa depensa bahin sa kahimtang sa iyang panglawas aron mausab ang una nang desisyon sa korte.
Wala usab nakit-an nga bag-ong ebidensya o dako nga kausaban sa iyang medical condition nga mahimong basehan sa temporaryong pagpagawas.
Giila usab sa ICC nga ang iyang wala pag-ila sa hurisdiksyon sa korte nagpasabot nga posibleng dili siya motuman sa mga mando kung makagawas, samtang aduna usab “real and substantial risk” nga siya makalikay o makabalda sa proseso sa hustisya tungod sa iyang impluwensya ug koneksyon.
Gitugotan sa korte ang depensa nga dili una mopakita si Duterte sa status conference nga gikatakda sa Mayo 27, basta mosumite og pormal nga hangyo.
Ang maong hearing maghisgot sa mga preparasyon sama sa iskedyul sa kaso ug ebidensya.
Ang kaso naggikan sa alegasyon sa mga extrajudicial killings nga nalambigit sa kampanya kontra droga sa iyang administrasyon.