Gipanghimakak ni Senador Robin Padilla ang mga alegasyon nga gitabangan niini sa pag-ikyas si Senador Ronald “Bato” dela Rosa gikan sa Senado human sa insidente sa pagpabuto sa pusil sa building niadtong miaging semana.
Sumala ni Padilla nga normal ug malinawon silang migawas sa Senado ug walay bisan unsang timailhan nga naglikay sila sa mga awtoridad.
Matud ni Padilla, dili mahimong tawgon nga “pag-ikyas” ang ilang paggawas tungod kay daghan kaayong police ug security personnel sa palibot sa Senado ug walay bisan kinsa nga mipugong kanila.
Gikumpirma usab sa senador nga siya ang kauban ni Dela Rosa sa paggawas sa Senado, apan gipatin-aw nga midungan lamang kini sa iyang sakyanan gumikan wala’y kaugalingong sakyanan ang senador niadtong gabhiona.
Dugang pa ni Padilla, nagpabilin siya sulod sa tulo ka adlaw sa Senado aron ubanan si Sen. dela Rosa sugod sa pagbalik niini sa sesyon.
Human sa insidente, midesisyon na kining mouli gumikan gipangita na usab siya sa iyang pamilya.
Dugang pa ni Padilla nga wala sila makakita og bisan unsang warrant of arrest gikan sa mga awtoridad, busa wala sila naghunahuna nga adunay operasyon sa pagdakop batok kang Dela Rosa.
Kahinumdoman nga gimandoan na sa Department of Justice ang Philippine National Police ug National Bureau of Investigation sa pagpatuman sa arrest warrant gikan sa International Criminal Court batok kang Dela Rosa, nga giingong kauban ni kanhi Pangulong Rodrigo Duterte sa giimbestigahang kampanya kontra ilegal nga droga.