Nagpadayon karon ang hot pursuit operation sa Cabanglasan Municipal Police Station batok sa duha ka lalaki human sa duguong insidente diin gilabay ug napatay ang usa ka 37-anyos nga biktima sulod sa Purok 8, Barangay Mandahican, Cabanglasan, Bukidnon.
Base sa otoridad, nahitabo ang krimen pasado alas-sais y medya (6:30) sa gabii niadtong Mayo 22. Una niini, naglakaw pauli ang biktima kauban ang usa ka alyas “Opaw” dihang nagka-away ang duha nga misangpot sa sinumbagay. Midagan pauli sa iyang balay ang biktima apan pipila ka minuto ang milabay, miabot ang 19-anyos nga suspek nga si alyas “Johny” uban kang alyas “Ogang” ug dinalian nga gilabay og kutsilyo ang biktima nga miigo sa wala nga bahin sa iyang tiyan.
Gideklara nang dead on arrival sa balay tambalanan ang biktima gumikan sa grabeng samad nga naangkon, samtang dinalian namang misupot sa wala matino nga direksyon ang mga suspetsado human sa maong krimen.