Milagrosong nakalingkawas sa kamatayon ang usa ka 48-anyos nga motorela driver human kini kalit nga gipusil sa duha ka armadong lalaki samtang nagpaabot og pasahero sa Purok 10, Barangay Poblacion, ning lungsod.
Sa nakuhang report gikan sa Don Carlos Municipal Police Station, nahitabo ang insidente pasado alas-3:00 sa kaadlawon niadtong Hunyo 18. Naglingkod lamang ang biktima sulod sa iyang sakyanan sa dihang mibutho ang mga suspek nga pulos naka-hooded jacket ug nagsakay og motorsiklo, diin dinalian kining gipusilan sa wala nga bahin sa iyang dughan. Bisan pa man sa seryosong samad, nakaya pa sa biktima ang pagpauli sa ilang balay ug dinalian kining gidala sa iyang kabanay ngadto sa Kibawe Provincial Hospital diin luwas na kini karon sa makuyaw nga kahimtang.
Apan duna’y “lubog” o dakong kalibog ang mga otoridad sa maong asoy. Sa gihimong pakisusi sa crime scene, nasuta nga lahi ang eksaktong dapit sa hitabo itandi sa unang pamahayag sa biktima, gawas pa nga wala’y nakitang mantsa sa dugo o basiyo sa bala sa maong lugar. Sa kasamtangan, gipaspasan na sa kapulisan ang paglusad sa CCTV backtracking ug dragnet operation pinaagi sa OPLAN SHIELD aron matino ang tinuod nga motibo ug makuha ang dugang detalye luyo sa maong pagpamusil.