20 patay, samtang kapin 100 ang missing sa kusog nga flash flood sa Afghanistan

Patay ang labing menos 20 ka tawo human giigo sa kusog nga flash flood ang amihanang-sidlakang bahin sa Afghanistan niadtong milabayng adlaw.

Sumala sa gobyernong gipadagan sa Taliban, ang pinakagrabeng kadaot natala sa siyudad sa Parun, ang kapital sa lalawigan sa Nuristan.

Gawas sa mga namatay, kapin 80 ka tawo ang nasamdan tungod sa kalit nga pagbaha. Gilauman pa nga mosaka ang ihap sa mga biktima tungod kay kapin 100 ka tawo ang gikatahong nawala hangtod niadtong gabii sa Lunes.

Nagpadayon ang search and rescue operations sa mga otoridad, apan gikabalak-an nila nga modaghan pa ang ihap sa mga namatay tungod sa kalapad sa kadaot.

Matud sa mga opisyal, lisod maabot ang ubang apektadong lugar tungod sa grabe nga epekto sa baha.