Nagpaalim karon sa ospital ang duha ka magsoon human sila dungan nga gidunggab sa upat ka mga suspek atol sa usa ka kasamok nga nahitabo sa Brgy. Miglamin, Malaybalay City, niadtong Abril 2, 2026, pasado alas-9:00 sa gabii.
Base sa report sa Malaybalay City Police Station, nagsugod ang tensyon sa dihang ang biktima nga usa ka menor de edad mibisita sa iyang uyab sa Purok 1B sa maong barangay ug giingong giatake sa grupo sa mga suspek. Nakalingkawas ang batan-on ug daling nanawag sa iyang 22-anyos nga magulang aron mangayo og tabang.
Sa pag-abot sa magulang, dungan silang miadto sa balay sa usa sa mga suspek aron komprontahon ang grupo, apan misangpot kini sa usa ka mainitong panaglalis ug komosyon. Giingong nakahapak og kahoy ang magulang ngadto sa grupo, hinungdan nga mibalos ang mga suspek ug gidunggab ang magsoon.
Bisan pa man sa mga samad nga naangkon, nakapangayo pa og tabang ang mga biktima sa ilang pamilya ug daling gidala sa Bukidnon Provincial Medical Center (BPMC). Sa pagkakaron, anaa na sila sa luwas nga kahimtang apan nagpabilin pang confined alang sa dugang pagtambal.
Pinaagi sa dinaliang aksyon sa mga sakop sa Barangay Public Safety Office (BPSO), malampusong nadakpan ang duha sa mga suspek, samtang ang laing duha nagpabiling at large ug gipangita pa sa gihimong follow-up operation sa kapulisan. Padayon pa ang lawom nga imbestigasyon sa otoridad aron masuta ang hingpit nga motibo ug mapahamtang ang tukmang kaso batok sa mga nalambigit.