Nakatingkagol na karon sa selda sa kapulisan ang usa ka 18-anyos nga lalaki human kini nasakpan sa akto nga nangawat og mga kable sa kuryente ug uban pang kagamitan sa usa ka abandonadong compound sa Purok 5, West Poblacion, Kalilangan, Bukidnon.
Base sa report sa Kalilangan Municipal Police Station, nahitabo ang insidente niadtong Marso 31, 2026, pasado ala-1:20 sa hapon. Nasayran nga usa ka mabinantayong lungsoranon ang daling midangop sa buhatan sa kapulisan human makit-an ang suspetsado nga misulod sa maong compound nga gipanag-iya sa usa ka 48-anyos nga babaye.
Sa pag-abot sa mga responding personnel, naabtan ang suspetsado nga nagguba sa electrical wiring sa usa ka grader truck ug dump truck aron kuhaon ang mga copper wire. Sa gihimong inspeksyon sa biktima uban sa mga opisyal sa barangay, nadiskobrehan nga nawala na usab ang mga baterya, spare tire, cutting machine, submersible water pump, grinder, hand drill, vibrator machine, ug 12 ka steel bars nga gibana-banang mobalor tanan og ₱160,500.
Ang suspetsado, kinsa residente sa Sitio Panamsamon, Brgy. Ninoy Aquino, Kalilangan, gidala na sa presinto human pahibaloa sa iyang mga katungod ubos sa balaod. Kasamtangan nang giandam sa kapulisan ang tukmang kaso nga ipasaka batok sa maong dinakpan.