Gipunting karon sa militar ang pagtapos sa nahibiling 12 ka miyembro sa New People’s Army (NPA) nga nagtatago sa boundary sa Agusan del Sur, isip kabahin sa kampanya sa pag-abot sa zero insurgency sa Bukidnon.
Sa pakighinabi sa Bombo Radyo Malaybalay kay Lt. Col. Jeorge R. Jallorina, Commander sa 8th Infantry Battalion, nga matod pa ang nahibilin nga mga rebelde sakop sa North Central Mindanao Regional Committee ug kadaghanan niini mga opisyal nalang lakip ang lider sa Headquarters Force Neo. Matud pa niya, dili na armado ang uban ug naglisod na sa kahimtang tungod sa kakapoy, kagutom ug kakulang sa suporta, hinungdan nga adunay gustong mosurender apan nahadlok tungod sa hulga sa ilang liderato.
Gibutyag usab ni Jallorina nga nabungkag na sa militar ang RSDG Compact sa miaging tuig ug napatay ang usa sa ilang lider nga si alyas Tado niadtong Pebrero 15, 2026, pinaagi sa padayon nga operasyon sa 403rd Infantry Brigade sa mga lugar sa Impasug-ong, Malaybalay ug kasikbit nga lugar hangtod sa Agusan del Sur.
Padayon ang operasyon sa militar aron masiguro nga mahurot ang nahibiling mga rebelde, samtang giawhag ang mga kini nga mosurender nalang ug mobalik sa gobyerno aron malikayan ang dugang pang kasamok.