Arestado si alyas “Victor” ug alyas “Juliver” human nasapon sa akto sa gipahigayon nga buy-bust operation sa mga awtoridad sa Purok 1, Brgy. Central Poblacion, Kalilangan, Bukidnon niadtong milabyang adlaw.
Nakumpiska gikan sa posisyon niini ang gibabana-bana nga ₱64,328 nga kantidad sa ilegal nga droga. Ang malampusong operasyon gipangunahan sa mga intel operatives sa Kalilangan Municipal Police Station ubos sa pamunoan ni PLT Richard B Guibao, inabagan sa 2nd Bukidnon PMFC, 1004th Company RMFB 10, ug Bukidnon PIU, inabagan sa Philippine Drug Enforcement Agency (PDEA).
Atol sa maong raid, nakuha gikan sa mga suspetsado ang lima ka sachet sa gidudahang shabu nga adunay kinatibuk-ang gibug-aton nga kapin sa 9.46 gramos.
Gawas sa mga ilegal nga droga, narekober usab sa kapulisan ang marked money nga gigamit sa transaksyon, usa ka cellphone, pouch, ug usa ka motorsiklo nga Kawasaki Barako nga adunay sidecar.
Sa kasamtangan, ang duha ka dinakpan anaa na sa kustodiya sa Kalilangan MPS alang sa kaukulang disposisyon ug giandam na ang pagpasangat sa kasong paglapas sa Republic Act No. 9165 o ang Comprehensive Dangerous Drugs Act of 2002 batok kanila.