Natala ang 18 ka insidente sa sunog sa lungsod sa Maramag, Bukidnon gikan Enero hangtod Agosto ning tuiga, diin kadaghanan niini naggikan sa gibiyaang abuhan o dapog human magluto.
Gibutyag ni SFO2 Rommel Macabasag, Chief of Intelligence and Investigation sa BFP Maramag, nga kasagarang hinungdan sa sunog sa mga panimalay mao ang gibiyaang baga tungod kay kahoy man ang gigamit nga sugnod sa kadaghanan sa mga lumulupyo. Lakip sa natala mao ang usa ka aksidente nga sunog sa usa ka bunkhouse sa Barangay Danggawan nga miresulta sa pagkamatay sa tag-iya niini.
Isip pangandam, giandam na sa BFP Maramag ang duha ka bag-ong fire truck gikan sa LGU Maramag ug sa buhatan ni Senator Zubiri alang sa mas paspas nga pagresponde, samtang gipahinumdoman usab ang publiko nga bas-on kanunay ang abuhan ug likayan ang pagsunog sa basura taliwala sa hulaw ug El Niño.