Gilas Pilipinas nakabawi human gilubong ang Kazakhstan 109-78 sa Asian Games

Nakabawi ang Gilas Pilipinas gikan sa ilang unang kapildihan human gipanglubong ang koponan sa Kazakhstan sa iskor nga 109-78 sa nagpadayong 20th Asian Games sa Aichi-Nagoya, Japan.

Tungod sa maong kadaugan, nakatala na og 1-1 win-loss record ang nasyonal nga koponan sa Group C. Gipangunahan ni Jerrick Ahanmisi ang madasigong opensa sa Gilas pinaagi sa iyang 22 puntos, samtang nidugang usab og 20 puntos si Robert Bolick. Nakatabang usab sa maong dako nga kadaugan sila si Calvin Oftana (12 puntos), Sedrick Barefield (11 puntos), ug Zavier Lucero (10 puntos).

Subay sa maong kalampusan, sunod nga atubangon sa Gilas Pilipinas ang wala pa’y pilde nga koponan sa China karong Lunes.