Nanawagan ang pipila ka mga senador sa kagamhanan ug sa Philippine Tennis Association (PhilTA) nga hatagan og bug-os nga suporta ang Filipina tennis star nga si Alex Eala human gipili nga modula alang sa nasod sa 2026 Asian Games sa Nagoya, Japan imbes nga mosabak sa mandatory WTA 1000 China Open.
Tungod sa pagkasandikit sa iskedyul sa duha ka kompetisyon, gihangyo ni Senator Bong Go, ang tsirman sa Senate Committee on Sports, ang mga tagdumala sa WTA nga hatagan og exemption si Eala gikan sa bisan unsang multa o silot sa iyang pagpili nga magsilbi sa iyang nasod.
Gipadangat usab ni Senator Raffy Tulfo nga dili kinahanglang ipaubos ang usa ka atleta sa sitwasyon diin kinahanglan niyang mopili tali sa iyang propesyon ug sa nasod, samtang nagpahayag nga ang tibuok katilingban nagpaluyo sa iyang desisyon nga dalhon ang bandila sa Pilipinas.