Duha ka mga suspek ang nadakpan sa kapulisan atol sa usa ka anti-illegal drug operation sa Balangay 1B, Poblacion, Quezon, Bukidnon alas 11:55 sa gabii kagahapong adlawa. Ang mga nadakpan mao sila si alyas “Albert,” 50 anyos, drayber ug taga-Maramag, ug alyas “Ed,” 32 anyos, utility worker sa DepEd ug taga-Quezon, Bukidnon.
Gibana-banaang 10.8 gramos sa gituohang shabu ang nakuha sa operasyon, nga adunay Standard Drug Price o SDP nga mokabat sa ₱73,440.
Nakuha usab sa mga operatiba ang ₱500 nga gigamit isip buy-bust money, lakip ang uban pang mga butang nga giisip nga ebidensiya.
Gipahigayon ang operasyon sa Quezon Municipal Police Station uban ang 2nd Provincial Mobile Force Company, Bukidnon Police Provincial Office ug Bukidnon Police Intelligence Unit, sa koordinasyon sa Philippine Drug Enforcement Agency o PDEA.
Ang mga dinakpan anaa na sa kustodiya sa Quezon MPS samtang giandam ang mga dokumento alang sa pagpasaka og kaso tungod sa giingong paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002.