Gihulagway ni Deputy Speaker Janette Garin nga “medyo bastos” ang paagi sa pag-cross-examine sa defense lawyer nga si Mark Vinluan kang kanhi Sandiganbayan Justice Amparo Cabotaje-Tang, nga nagsilbing expert witness sa prosekusyon sa impeachment trial.
Dugang pa ni Garin, nakurat siya sa pamaagi ni Vinluan sa pagpangutana, ilabi na sa mga pangutana kung apil ba si Cabotaje-Tang sa grupong “Kakampink” o die-hard Duterte supporter.
Gipasabot ni Garin nga isip usa ka babaye, wala niini na-uyunan ang maong pamaagi sa pagpangutana, ilabi na kay anaa ang kanhi mahistrado aron mohatag og ekspertong interpretasyon bahin sa balaod base sa iyang kasinatian.
Gipunting usab ni Garin ang taas nga rekord ni Cabotaje-Tang sa serbisyo publiko ug kasaligan ang integridad niini.
Samtang, gidayeg ni Garin ang kanhi mahistrado sa iyang pagpatin-aw sa konsepto sa unexplained wealth ug sa kamahinungdanon sa sinumpaang SALN.
Matud ni Garin, walay problema kung adunay pondo nga makita sa bank account sa usa ka public official, basta mapamatud-an nga legal ang gigikanan niini ug tukma sa bahandi nga gidiklara sa SALN.